![Image](/images/2023/04/14/pelerins.png)
![Image](/images/2023/04/14/pelerins.png)
Hari kuri uyu wa gatandatu igenekerezo rya 18 Mukakaro aho Ekleziya iri i Bubanza yari mu kanyamuneza ko kwatira mw’ibanga ry’ Ubusaserdoti imisore itandatu yari imaze imyaka itari mike ivyitegurira, hamwe n’imisore itanu yatirwa mw’ibanga ry’ubudiyakoni ; tutibagiye abandi batari bake bashikirizwa ubutumwa bwo gusoma Ijambo ry’Imana hamwe n’abakorezi. Iyo migirwa ikaba yabereye mu Nkuka ya misa yahererejwe muri Paruwasi yitiriwe « Bikira Mariya yabonye amagorwa yose » ya Musigati, ikaba yari irongowe na Nyenicubahiro Musenyeri Yohani NTAGWARARA Umwungere wa Diyoseze ya Bubanza.
Abakristu bavuye mu mihingo itandukanye ya Diyoseze hamwe n’abakunzi bayo bari basidukanye n’iyonka muri ivyo birori. Umwungere wa diyoseze ahejeje gutanguza imisa, Patiri mukuru wa paruwasi Musigati Jorji NDAGIJIMANA yaciye ashikiriza ijambo ryo kwakira abashitsi batandukanye bari bitavye urwo rubanza rudasanzwe. Mw’ijambo ryiwe, yarahaye ikaze abari aho bose. Yisunze ibihe bidasanzwe iyo paruwase yaciyemwo, igahura n’amagume menshi, gushika n’aho abakristu bahunga kubera amabombe menshi yategwa muri ako karere, Umwungere wa Diyoseze yahavuye ayiragiza “Bikira Mariya, MUGABEKAZI YABONYE AMAGOGWA YOSE”. Patiri mukuru yaribukije Umwungere wa Diyoseze ko yokomorera abakristu b’iyo paruwasi umuhango yabemereye: ISEMINARI NKURU. Mu gusozera ijambo ryiwe, ntiyibagiye gusaba abaserukiye Leta ko bofasha kugira ngo Paruwasi na komine Musigati bironswe ibarabara ryiza ryohuza Paruwasi Musigati na Paruwasi Muyebe.