UMUSI W’UMUKAMA WAHARIWE IJAMBO RY’IMANA WARAHIMBAJWE I BUBANZA

Kuw’Imana ugira gatatu mu gihe gisanzwe ca liturjiya, Ekleziya iyo iva ikagera yahimbaje ubugira kabiri umusi mukuru wahariwe gushemeza Ijambo ry’Imana. Uwo musi ukaba washinzwe na Nyenubweranda Papa Fransisko ku wa  30/9/2019 mw’ikete ryiwe yise : « Arabahumura »- Apruit Illis. Ni muri iyo ntumbero rero, Abakristu bavuye mu mihingo itandukanye ya paruwase Bubanza basidukanye n’iyonka guhimbaza Ijambo. Inkuka ya misa ikaba yaherejwe na Nyenicubahiro Musenyeri Yohani NTAGWARARA, Umwungere wa Diyoseze ya Bubanza.

Iyo nkuka yatangujwe n’urugendo rurerure rwahereye mu kigo c’amanama citiriwe « Mwungere Mwiza». Abajejwe liturjiya y’uwo musi bagenda barasemerera n’ijwi rirenga Ijambo ry’Imana, abaririmbiramana nabo bagenda barasamiriza indirimbo z’ubutumwa. Ivyo vyose bikaba ubundi buryo bushasha bwo kumenyesha Inkuru nziza.

Mu nsigisho yiwe, Umwungere wa diyoseze Bubanza, yisunze ibisomwa vy’uyo musi, yaribukije abakristu bose ko Ijambo ry’Imana ritegerezwa kuba ubuzima bwa misi yose ati : « Nimutunge Ijambo ry’Imana (Bibiliya), murisome, murikunde, murizirikane riheze rihindure ubuzima bwanyu ». Yisunze ico iryo Jambo ryakoze mu buzima bw’abantu, yaratumiriye abakristu gukunda gusoma Ijambo ry’Imana kuko rikiza, ati : « Ijambo ry’Imana twama twaryumvise mu nkuka ya misa ; rifise ikibanza kinini muri liturjiya. Ntimuryumve gusa ngo rirengane, ariko nimuryakire riheze rihindure ubuzima bwanyu. Atari uko, muzokwama mwaryanye ».

Twobamenyesha ko iryo Jambo (Bibiliya) ryaje rireruwe mu cubahiro cinshi, maze abari ku rugendo bakagenda basabira Ekleziya n’igihugu.

Patiri Romain NDIHOKUBWAYO