UBUCUTI HAGATI YA PARUWASI RUMONGE NA PARUWASI KIGWENA

Kuw’Imana igenekerezo rya 22 Nzero 2023, Paruwasi ya Rumonge yarangendeye paruwasi ya Kigwena. Izo Paruwasi zose zikaba ziri mu ntara y’ubutumwa y’Imbo muri Diyosezi Gatorika ya Bururi. Ibirori nyezina vyabereye mu Nkuka ya misa yari irongowe na patiri Yohani Batista NDIKURIYO kumwe na patiri Piyo NZOYIHIKI yari yaherekeje abakristu bo mu Rumonge.

Intumbero nyamukuru y’urwo rugendo yari iyo gukomeza ubucuti hagati y’ayo ma Paruwasi. Mu Nkuka ya misa patiri Yohani Batista yarahaye ikaze patiri Piyo n’abo bari bagendanye.

Mu nsiguro yiwe, patiri Piyo yashimikiye cane kubijanye n'umusi w’Imana wahariwe Ijambo ry'Imana, aho yamenyesheje abari muri iyo Nkuka ko uyo musi watangujwe na Nyenubweranda Papa Fransisko mu mwaka wa 2019. Uyo Mwungere y’Ekleziya yose agahimiriza abakristu gusoma no gukunda cane Ijambo ry’Imana.

Uyo musi nyene, abatambiramana n'abiyerekeramana bo kw’ishure rya GATETE iri muri Paruwasi ya Rumonge, nabo nyene bari bagendereye abavukanyi babo bo kw’ishure rya CABARA iri muri Paruwasi ya KIGWENA.

Twobamenyesha ko ivyo birori vyari bihimbaye cane haba aho kw’i Paruwasi ya KIGWENA canke aho kw’ishure rya CABARA. Inkuka ya misa irangiye baciye bagenda kwiginana. Umukama aninahazwe!

Alexis HAMENYIMANA