UGUHUMANURA INGORO Y'IMANA YA PARUWASE KARUSI
Hari ku musi w'Imana ugira 4 mu gihe ceranda c’Ikarema, igenekerezo rya 30 ntwarante 2025, mu nkuka y’imisi yatanguye isaha zibiri n'igice (8h30), irongowe na Nyenicubahiro Umwungere Mukuru wa Diyoseze Nkuru ya Gitega Musenyeri Bonaventura NAHIMANA, aho habera ibirori vyo guhumanura Ingoro y’Imana ya Paruwase Karusi yitiriwe Umushaha Mweranda wa YEZU, yari yahumanijwe n’abagizi ba nabi.
Iyo nkuka yatangujwe n'urugendo. Musenyeri Bonaventura ahagaze ku muryango inzugi zose z'iyo sengero zugawe kuva aho abagizi ba nabi bugururiye umuryango mukuru wayo bakiba Umukama, bakanatwara n'ivyuma biduza amajwi, yarafashe ijambo yibutsa abari aho ko guhumanya ingoro y’Imana ari igicumuro kibi cane. Yaciye atyorora iyo ngoro yongera ahezagira n'itabernakulo nshasha yari yategekanijwe.
Mu nsiguro yiwe yagize ati: “Jewe ndibaza ico namwe mwokwibaza: nk’ubu abamenye itabernakulo bashaka iki? Yezu wewe bakuyeyo bamushize he? Bariko baramukoresha iki? Ajorewe, ati: birateye agahinda kuko usanga bariko bamukoresha mu bintazi, ubupfumu canke mu gusabira abagwaye n’ibindi”. Kubwiwe, ni amahirwe rero abakristu b’iyo Paruwase bagize kubona yaciye ajayo mu kiringo gito, ahandi ho hategerezwa guca ikiringo kinini kugira babanze kwisonzesha, bakambara amagunira, bakisiga iminyota, bagasaba ikigongwe Umukama yafashwe nabi. Yarongeye ati: “Kubera ko ico kibi kibishe gishobora gukorwa n'abakristu katorika canke abapagani? musabwe kwama maso kandi mugavye mwongere mwame murondera kuba beranda ngo munywane na Yezu yababaye kandi yama ariko arababazwa na twebwe yacunguye.
Twobamenyesha ko iyo Nkuka y'imisa yasozerewe n’uguteramira Yezu muri Ukarisiya akanya gatoyi, umwungere aca aramujana mwitabernakulo nshasha abanje kuyosa. Imisa irangiye umwungere mukuru yaciye asaba abakristu bose babishoboye kuguma bateramiye Yezu isaha yose ngo basubire bamwereke urukundo bamufitiye baca bashira Yezu ku ngoma barashengerera isaha yose.
Grégoire RUSUKU kumwe na Juvenal HAVYARIMANA